❧ A Monseigneur le Reverendissime Cardinal de Meudon
Encores et encores ma muse m’a dit que quand auriez leu les odes penitentes de son moins que rien, ses epigrammes et larmes vous estans presentees par monsieur le tresorier le Maçon, vous despendriez quelques heures oisives, ou plus tost desrobées en l’officine de voz grans et pesans affaires pour les lire, et qu’en continuriez la lecture jusques à ma bergerie d’honneur faicte sur vostre retour et bien heureuse compagnie de voz vertuz lesquelles font rougir les plus vertueux, pour le comble d’icelles. Là vous verrez voz bergers tristes et demy morts tantost faire vœux pour vostre retour, tantost (ainsi que l’adversité n’est eternelle, ne la prosperité perdurable) plus aise que demy dieux pour la nouvelle de vostre venue chanter hymnes, versetz et cantiques triez et espuisez en la fontaine de liesse, le tout à vostre honneur. Je vous supply, monsieur, rendre ma muse veritable, et voir par la lecture de ses œuvres en quelle devotion elle est pour vous complaire par quelques aggreables services.